Higit 3,400 na senior citizens, makatatanggap na ng social pension

Matatanggap na ng 3,440 na indigent senior citizens ang kanilang social pension para sa first half ng 2020 at/o ang hindi pa nila nakukuhang pensiyon para sa taong 2019.

Ito ay matapos na tanggapin ng Provincial Social Welfare and Development Office (PSWDO) at Provincial Treasurer’s Office ang tseke na nagkakahalaga ng P11,547,000 mula sa Department of Social Welfare and Development Region 3 noong June 3, 2020 sa Old Capitol, Cabanatuan City.- Ulat ni Danira Gabriel

Watch – Higit 3,400 na senior citizens, makatatanggap na ng social pension

7 bayan at 3 lungsod sa Nueva Ecija na naapektuhan ng COVID-19 nakatanggap ng isda mula sa Bureau of Customs (BOC)

Nabigyan ng tig-250 boxes ng frozen fish ang 7 bayan at 3 lungsod sa Nueva Ecija na naapektuhan ng pandemya dulot ng COVID-19 mula sa Bureau of Customs (BOC) noong June 4, 2020.

Inatasan ang Department of Social Welfare and Development (DSWD) na magsagawa ng assessment at piliin ang mga bayan at lungsod base sa dami ng mahihirap na pamilya na naninirahan rito.

Batay sa ginawang pagtukoy ng DSWD, napili ng ahensya ang mga mga bayan ng General Mamerto Natividad, Licab, Llanera, Nampicuan, Peñaranda, Quezon, Talugtug, mga lungsod ng Gapan, Palayan, at Lungsod Agham ng Muñoz bilang mga lugar sa lalawigan na nangangailangan ng suporta.

Ayon naman kay Provincial Social Welfare and Development Office (PSWDO) Chief Elvie Ronquillo, ang mga nabigyang pamilya ay nakabase sa listahan ng mga low-income families na naitala ng kani-kanilang Local Government Units (LGUs) at Municipal Social Welfare and Development Office (MSWDO).

Nagpapasalamat si Ronquillo sa Bureau of Customs sa pamimigay ng donasyon, sa DSWD at kay Governor Aurelio Umali sa pagsasakatuparan ng operasyon upang mabigyan ng biyaya ang mga Novo Ecijanos. – ulat nina El dela Cruz/Shane Tolentino

Watch – 7 bayan at 3 lungsod sa Nueva Ecija na naapektuhan ng COVID-19 nakatanggap ng isda mula sa Bureau of Customs (BOC)

Rotary Club-NE, nag donate ng mahigit 2,500 PPE, facemasks at face shields sa provincial government

Pinagkalooban ng mahigit dalawang libo at limang daang pirasong washable Personal Protective Equipment (PPE), facemasks at face shields ng Rotary Club District 3770 ang Pamahalaang Panlalawigan ng Nueva Ecija bilang tugon sa pangangailangan nito ngayong mayroong COVID-19 crisis.

Isinagawa ang turn over ceremony noong June 02, 2020 sa Old Capitol Cabanatuan City.

Ayon kay District Governor Jon Alonzo, ito na ang pangatlong beses na nagbahagi ng tulong ang samahan sa pamamagitan ng Rotary Foundation at Rotary Taiwan sa ilalim ng kontra COVID-19 alay sa Nueva Ecija Global Grant Project.

Malugod namang tinanggap nila Gov. Aurelio Umali, Rotarian Vice Gov. Anthony Umali at Provincial Health Officer Dra. Josie Garcia ang mga donasyon.

Malaking tulong anila ang mga ibinahaging kagamitan upang maproteksiyunan ang mga unang linyang manggagawa na patuloy na humaharap sa krisis sa kalusugan.

Inaasahan na sa mga susunod na araw ay ipapamahagi ang medical equipment sa mga health workers at front liners ng pamahalaang panlalawigan.

Ang Rotary Club ay non-political at non-religious organization na binubuo ng mga negosyante at propesyunal na indibidwal na nagsasama-sama upang makapagbigay ng serbisyo sa pamayanan. –Ulat ni Danira Gabriel

Watch – Rotary Club-NE, nag donate ng mahigit 2,500 PPE, facemasks at face shields sa provincial government

Dry run ng one-way traffic scheme sa Cabanatuan City, nagdulot ng matinding pagsisikip ng trapiko

Nagkaroon ng matinding pagsisikip ng trapiko sa mga pangunahing kalsada ng Cabanatuan City noong May 23, 2020, bandang alas syete ng umaga dahil sa dry run na ginawa ng Cabanatuan Police at mga tauhan ng Lokal na Pamahalaan ng Cabanatuan para sa pagpapatupad ng one-way rerouting traffic scheme sa Maharlika Highway.

Maraming motorista na lubhang naabala ang byahe ang nagalit at nagpost ng mga reklamo sa social media dahil sa bumper to bumper na traffic.

Lahat ng mga nanggaling sa south bound na papasok ng Cabanatuan City ay hindi pinadaan sa national highway bagkus ay pinaliko sa Lakewood at pindaan sa Vergara Highway patungong NE Crossing.

Habang ang mga sasakyang palabas naman ng lungsod mula sa north bound lang ang pinayagang makadaan sa Maharlika highway.

Nakumpirma ng TV48 na ang LGU Cabanatuan City ang nagpatupad ng one-way traffic scheme na ito base sa naging talakayan sa programa ni Vice Mayor Jay Vergara sa DWJJ noong May 23, 2020.

Sa panayam kay Provincial Director PCol Leon Victor Rosete ng Nueva Ecija Police Provincial Office ay sinabi nitong dahil walang koordinasyon ang LGU Cabanatuan sa Nueva Ecija-Inter Agency Task Force ay inatasan sila upang kaagad na ipatigil ito.

Base aniya sa Omnibus Guidelines on the Implementation of Community Quarantine ay hindi dapat ipatupad ang one-way traffic scheme sa National at Provincial Highway na maaaring maging dahilan nang pagkaantala ng delivery ng mga cargos at pagbigat ng daloy ng trapiko.

Dapat din aniya ay mga PNP personnel ang nangangalaga ng pagbabantay sa mga pambansa at panglalawigang mga kalsada at hindi mga tauhan ng LGU.

Alas tres ng hapon noong May 23, 2020, naibalik ang banayad na daloy ng trapiko matapos tanggalin ng mga kapulisan ng 1st and 2nd Provincial Mobile Force sa tulong ng mga sundalo mula sa 84th Infantry Battalion ang mga one-way signages sa boundary ng Sta. Rosa-Cabanatuan City, Circumferential Road at iba pa.

Mariin ding itinanggi ni PD Rosete at sinabing fake news ang facebook live ni Pepe Balagtas, reporter ng DWJJ, noong 1:55 ng hapon noong araw ding iyon na nagsasabing katuwang ang kapulisan ng NEPPO sa pagpapatupad ng one-way traffic scheme sa Cabanatuan City.— Ulat ni Jovelyn Astrero

Watch – Dry run ng one-way traffic scheme sa Cabanatuan City, nagdulot ng matinding pagsisikip ng trapiko

Mayor Vargas ng Aliaga, humingi ng paumanhin kay Governor Umali at sa ELJ Hospital

Humingi ng paumanhin si Aliaga Mayor David Angelo Vargas kay Governor Aurelio Umali at sa mga staff ng ELJ sapagkat nagamit ng Ang Bagong Nueva Ecija fb page ang kanyang statement tungkol kay patient #52 upang palabasin na nagpabaya ang pamahalaang panlalawigan at ang naturang ospital.

Aniya, dahil sa kawalan ng quarantine facility sa kanilang bayan ay tama lamang na magstrict-home quarantine si patient #52 base sa payo ng ELJ Hospital nang payagan itong umuwi dahil wala na siyang nararamdamang anumang sintomas ng COVID-19.

Sa post ng Ang bagong Nueva Ecija noong May 19,2020 ay sinabi na idinischarge sa ELJ Memorial Hospital si patient #52 at pinaghome quarantine lamang sa halip na ipadala sa mga quarantine area na nagdulot ng maling impresyon sa mga tao.

Nauna na rito, sa programang Usapang Malasakit sa Lipunan noong May 19, 2020 ay mariing pinabulaanan ni Governor Umali ang post na ito ng Ang Bagong Nueva Ecija dahil lahat aniya ng detalye sa pasyente ay dokumentado simula pa lamang nang makaramdam ito ng sintomas hanggang sa magpositibo sa COVID-19.

Sa panayam kay Chief of ELJMH-Dr. Augusto Abeleda Jr. ay ipinaliwanag nito na si patient #52 ay tatlong linggong nanatili sa ELJ at wala ng ipinapakitang sintomas ng sakit kung kaya’t ninais nang makauwi ng kanyang bahay.

Dahil sa kahilingan ng pasyente ay nakipag-ugnayan ang ELJ sa Regional Epidemiology Surveillance Unit (RESU) kung maaari na itong pauwiin habang hinihintay ang resulta ng kanyang swab test, na pinahintulutan naman nila dahil base sa protocol ng Department of Health (DOH) maaari nang pauwiin ang isang pasyente kung wala nang ipinapakitang sintomas ng COVID-19 ngunit dapat ay sumailalim sa 14 days quarantine.

Matatandaan na mahigpit na ipinag-utos ng Nueva Ecija Inter-Agency Task Force sa lahat ng mga Hospital sa lalawigan na bago palabasin sa pagamutan ang mga pasyenteng gumaling at nagpositibo sa COVID ay kinakailangang masiguro na may quarantine facility itong magagamit sa kanilang tahanan, kung wala ay maaari itong dalhin sa mga identified quarantine facility sa bawat bayan o lungsod.

Sa kaso ni patient #52, May 8, 2020 nang payagan itong makalabas ng ospital at dahil mag-isa lamang ito sa bahay at walang ibang maaaring makahalubilo ay pinag-strict home quarantine ito.

May 17, 2020 nang lumabas na positibo siya sa COVID-19 ngunit dahil asymptomatic na ang pasyente ay muli itong isinailalim sa pangalawang swab test kung saan nagnegatibo ito sa coronavirus disease at idineklarang naka recover na noong May 21, 2020.

Sinabi ni Dr. Abeleda na dahil sa post ng Ang Bagong Nueva Ecija ay masasakit na salita ang kanilang natanggap mula sa mga netizen sa kabila ng sakripisyo ng mga frontliners upang makapagligtas ng buhay ng mga tinamaan ng sakit.

Babala ni Governor Umali sa mga admin ng naturang page na gagawa siya ng legal na hakbang kapag hindi inayos ng mga ito ang pagbibigay ng impormasyon tungkol sa COVID-19.-ulat nina Maybelle Ramirez at Amber Salazar

Watch – Mayor Vargas ng Aliaga, humingi ng paumanhin kay Governor Umali at sa ELJ Hospital

Lalaking nagkaroon ng kumplikasyon sa operasyon, tinulungan ni Governor Aurelio Umali

Ngiti at pasasalamat ang isinalubong ni Aljhon Domingo sa crew ng TV 48 ng amin syang bisitahin pagkatapos ng kanyang operasyon sa ELJMH noong May 19, 2020 matapos na maimpeksyon ang inilagay na bakal na implant sa kanyang binti.

 Si Aljohn ay tubong Talugtug, Nueva Ecija at nagta -trabaho sa isang lending company sa Isabela. Sa kwento ng binata, nagsimula ang lahat nang maaksidente siya noong August 5, 2019.

Sakay ng minamanehong motorsiklo pauwi siya galing Isabela nang sumalpok sa Crosswind na kanyang sinusundan. Napektuhan ng aksidente ang kanang hita ng binata dahil nabali ang buto nito kaya nilagyan ng bakal.

Imbes na tulungan umano siya ng may ari ng Crosswind sa gastusin sa ospital ay nabaligtad pa ang sitwasyon dahil sya pa ang pinagbabayad ng 80,000 pisong danyos.

Umabot sa mahigit isandaang libong piso ang naging gastos sa operasyon ni Aljohn na iniraos gamit ang sariling pera ng pamilya na ang kalahati ay sinagot ng kanyang kumpanya.

Buwan ng Pebrero taong kasalukuyan ay nagsimulang magnaknak ang inoperahang hita ng binata at nagpakita ng senyales ng kumplikasyon kaya kinailangang muling maoperahan.

 Dahil sa kakulangan ng pera para sa panibagong operasyon ay lumalala ang kanyang kalagayan kaya minarapat ng kanyang pinsan na humingi na ng tulong kay Governor Aurelio Umali sa pamamagitan ng pagpapadala ng mensahe sa Nueva Ecija TV 48 facebook page noong May 11 at sa araw mismo na nabasa ni Governor Umali ang mensahe ay pina admit na si Aljhon sa ELJ.

Binigyan ng kwarto at gamot si Aljohn at inihanda para sa operasyon na sinagot lahat ni Gov Oyie ang gastusin sa ospital.

Masayang inihayag ni Doc Jhong Abeleda Jr. na matagumpay ang operasyon ngunit mananatili pa ng ilang araw si Aljhon sa ospital upang makumpleto ang antibiotics nito.

Bilang isang ina masakit para kay aling Gemma ang nangyaring aksidente sa kanyang anak na na ang nais lang ay magtrabaho upang makapag ipon ng pang paaral sa kanyang sarili.

Kaya naman lubos ang kanilang pasasalamat kay Governor Umali dahil sa maagap na pagtugon nito sa kanilang panawagang tulong medikal.

Balak ni Aljhon na kapag tuluyan nang maghilom ang kanyang sugat ay ipagpapatuloy nito ang trabaho at pag iipunan ang pang paaral niya upang matupad ang pangarap na maging isang sundalo o pulis.

Watch – Lalaking nagkaroon ng kumplikasyon sa operasyon, tinulungan ni Governor Aurelio Umali

Protocol ng SM City Cabanatuan sa ilalim ng Modified ECQ, Pinuri ni Governor Umali

Pinuri ni Governor Aurelio Umali sa kanyang personal na pag-inspeksyon noong Huwebes, May 21, 2020 ang SM City Cabanatuan sa mahigpit na pagpapatupad nito ng protocol mula sa Department of Health (DOH) upang matiyak ang kaligtasan ng bawat Novo Ecijano mula sa sakit na COVID-19.

Ayon kay Governor Umali, nagagalak siya sa naturang Mall sa kanilang pakikiisa sa pamahalaang panlalawigan sa pagsasagawa ng mga safety measures gaya ng paglalagay ng limitasyon sa mga tao na pumapasok sa Department Store upang masunod ang social distancing.

Sa pagpasok pa lamang ng SM City ay makikita nang sinusukat muna ang temperatura ng isang indibidwal habang nakatapak ito sa disinfectant mat upang mamatay ang mga mikrobiyo sa suot nitong sapatos o tsinelas, matapos ito ay dapat munang magsanitize ng kamay gamit ang alcohol bago makapasok sa loob.

Pinuntahan ng gobernador ang bawat parte ng mall kabilang na ang mga store dito kung ipinapatupad ng mga ito ang mga protocol.

Tiningnan din nito kung palagiang sinasanitize ang bawat Comfort Rooms at mga bagay na madalas mahawakan ng tao kagaya ng mga lamesa.

Dagdag pa ni Gov Oyie na sa pamamagitan ng kooperasyon at disiplina ng mga tao ay mapipigilan ang pagkalat ng virus sa Nueva Ecija kahit nasa MECQ na ito.

Kasunod na ininspeksyon ng gobernador ang SM Mega, S&R, NE Pacific Mall at Robinsons upang tingnan din kung maayos ang pagpapatupad ng mga ito ng mga safety measures upang maiwasan ang COVID-19.

Hiling ng ama ng lalawigan na pamarisan sana ng lahat ng Malls hindi lamang sa Nueva Ecija ang SM City Cabanatuan at tiyaking mahigpit ang pagpapatupad ng protocols hanggang sa matapos ang laban kontra COVID-19.

Watch – Protocol ng SM City Cabanatuan sa ilalim ng Modified ECQ, Pinuri ni Governor Umali

Paglala ng sintomas ng Covid, maaaring mapigilan sa unang stage pa lamang ayon sa isang cardiologist

Maaari umanong mapigilan ang paglala ng mga sintomas ng COVID-19 kung maaagapan ito sa unang linggo pa lamang.

Ito ang inihayag ni Dr. Willy Veneracion, espesyalista ng Internal Medicine, Critical Care and Cardiology at kasalukuyang Training Faculty ng Department of Internal Medicine ng PJG Hospital.

Sa panayam kay Dr. Veneracion ipinaliwanag nito na ang mekanismo na nangyayari sa COVID ay ang pamamaga ng kalamnan o mga ugat sa iba’t ibang bahagi ng katawan at pagkakaroon ng pagbabara ng mga dugo, kaya ang nagiging pangunahing sintomas nito ay ang lagnat, ubo, sipon, at hirap sa paghinga.

Base sa kanyang karanasan sa panggagamot sa epekto ng virus sa katawan ng isang tao ay nakabuo siya ng guidelines kung paano mapipigilan o mapagaling ang mga sintomas ng COVID, na kahalintulad sa MATH+ Early Intervention Protocol na binuo ng lima o higit pang doktor sa America.

Sa MATH+ protocol ay nagkaroon umano sila ng 98-100% success rate kung saan gumaling ang kanilang mga pasyente at hindi na umabot pa sa stage two o mas kritikal na kondisyon ng sakit.

Ang MATH+ protocol ay binubuo ng mga gamot na Methylprednisolone na inihahalo sa swero para sa pamamaga ng mga kalamnan, Ascorbic Acid o Vitamin C para sa pampalakas ng immune system, Thiamine o Vitamin B1 para sa puso at Heparin para sa blood clots o pamumuo ng dugo sa mga ugat.

Kung sa unang araw pa lamang aniya ng mga sintomas ng COVID ay lalapatan na ang pasyente ng tamang gamot na nakapaloob sa MATH+ protocol ay maaaring hindi na lumala ang lagay nito.

May mga naging pasyente na aniya siya na naniwala sa kanyang guidelines na gumaling mula sa naranasang mga sintomas ng COVID-19.

Ngunit ang dilemma daw ng mga doktor na nakabuo ng MATH+ protocol katulad nya ay hindi ito makapasok sa guidelines ng World Health Organization na sinusunod ng mga ospital sa paraan ng panggagamot sa COVID dahil hindi ito dumaan sa randomized testing, trial o pag-aaral.

Para magamit ito sa hinaharap ay may mga hakbang nang isinasagawa si Dr. Willy Veneracion upang maikonsidera ang kanyang nabuong guidelines sa panggagamot sa COVID-19 patients. -ulat ni Jovelyn Tañedo Astrero-Madriaga

Watch – Paglala ng sintomas ng Covid, maaaring mapigilan sa unang stage pa lamang ayon sa isang cardiologist

Mga estudyanteng na istranded sa Baguio dahil sa ECQ, nakauwi na sa tulong ng PGNE

Sinundo noong May 1, 2020 ng “BALIK NUEVA ECIJA” Transportation team ng Provincial Government ang 24 na estudyante mula sa iba’t ibang unibersidad sa Baguio City matapos na makaabutan ng Enhanced Community Quarantine (ECQ) na naging dahilan ng pananatili nila doon ng halos dalawang buwan.

Alas-siyete ng umaga ng tumulak patungong Baguio ang team ng kapitolyo sakay ang dalawang shuttle bus na sumundo sa mga estudyanteng mula sa mga Lungsod ng Cabanatuan, San Jose at Muñoz at mga bayan ng Aliaga, Lupao, Talugtug, Rizal at Jaen.

Matapos ang humigit kumulang tatlong oras na biyahe ay nakarating ang grupo sa St. Louis University kung saan matiyagang naghihintay ang mga estudyante.

Bago nakauwi ang mga estudyante ay nagsagawa muna ng check-up operation ang  St. Louis Hospital at silang lahat ay walang anumang sintomas ng COVID-19  kaya’t pinayagan sila na makabalik sa Nueva Ecija.

Habang bumabiyahe ay dito nakakwentuhan ng Balitang Unang Sigaw News Team ang naging karanasan ng mga estudyante.

Isa nga sa aming nakapanayam ay si Steven Kent Mananing ng St. Louis University, aniya ninais niyang makauwi nang Nueva Ecija dahil siya na lamang ang natirang mag-isa sa kaniyang tinutuluyan matapos na umuwi sa kani-kanilang probinsiya ang kaniyang mga kapwa estudyante.

               Lubos ang kaniyang pasasalamat sa pamahalaang panlalawigan at sa mga eskwelahan na nagtaguyod ng kanilang mga pagkain sa nagdaang mga araw na pananatili nila sa Baguio.

              Ayon kay Provincial Tourism Officer Jose San Pedro, batid ng gobernador ang hirap ng mga estudyante na limitado lamang ang panggastos sa araw-araw bukod pa sa mga magulang ng mga ito na nag-aalala sa kalagayan ng kanilang mga anak.

  Pagdating ng team kapitolyo sa Old Capitol, Cabanatuan City ay sabik na sinalubong ang mga estudyante ng kanilang mga pamilya.

             Ang “BALIK NUEVA ECIJA” program ng pamahalaang panlalawigan ay naglalayong matulungan ang mga kababayang Novo Ecijano na makauwi sa kani-kanilang mga probinsya.ulat ni Myrrh Guevarra

Watch here: Mga estudyanteng na istranded sa Baguio dahil sa ECQ, nakauwi na sa tulong ng PGNE

TESTING KITS AT QUARANTINE FACILITIES, PINAPATUTUKAN NI GOV OYIE UMALI

Pinapatutukan ni Nueva Ecija Inter-Agency Task Force (NE-IATF) Chairman Gov. Aurelio Umali na paigtingin ang paghahanap ng gagamiting testing kits at karagdagang quarantine facilites para sa mga Persons Under Investigation (PUIs) at Persons Under Monitoring (PUMs) sa lalawigan.

Ito ang kaniyang inihayag sa isinagawang NE-AITF meeting sa Old Capitol, Cabanatuan City, kahapon, May 01, 2020.

Ayon sa gobernador, kailangan niya ng rekomendasyon ng mga doktor kung anong testing kits ang gagamitin upang masimulan na ang pagbili para sa isasagawang mass testing.

Inatasan din ni Gov. Umali ang mga miyembro ng IATF na patuloy na maghanap ng mga posible pang quarantine areas upang matulungan na masuportahan ang mga ospital sa panahon na hindi na nito kayang mag-admit ng mga pasyente.

Sa kasulukuyan ay humigit kumulang 49 quarantine facilities ang mayroon sa probinsiya.

Naniniwala ang Task Force Chair, na ang pananatili sa ilalim ng Enhanced Community Quarantine (ECQ) ang magreresolba upang maging COVID-19 free ang Nueva Ecija.

Magsilbi aniyang leksiyon ang mga nangyari sa bansang Singapore at Japan na agad inalis ang lockdown kaya nakararanas ngayon ng 2nd wave ng COVID-19.

Hindi niya umano papayagan na masayang lang ang sakripisyo at pagod na ginagawa ng mga health workers at iba pang frontliners kung mamadaliin ang pag-aalis ng lock down.-Ulat ni Danira Gabriel

Watch here: TESTING KITS AT QUARANTINE FACILITIES, PINAPATUTUKAN NI GOV OYIE UMALI

Nagdonate ng 3,000 na sako ng palay na may timbang na 20 kilo per bags ang Philippine Rice Institute (PhilRice) sa Provincial Government ng Nueva Ecija bilang suporta sa pamamahagi ng ayudang bigas sa mga Novo Ecijano.

Ayon kay Julian Macadamia, Science Research Specialist II, Regional Coordinator ng Rice Competitiveness and Enhancement Fund ng PhilRice, ang mga low germination seeds na kanilang ipagkakaloob sa pamahalaang panlalawigan ay hindi na maaaring ipamahagi sa mga magsasaka upang itanim pero maaaring ipagiling para maging bigas.

Ani Macadamia, layunin nilang makatulong sa ating mga kababayan sa pamamagitan ng pamahalaang panlalawigan lalo na ngayong panahon ng krisis sa kalusugan.

Pumirma si Governor Aurelio Umali sa Deed of Donations ng PhilRice bilang malugod na pagtanggap sa tulong, kasama si Provincial Social Welfare and Development Officer Elvie Ronquillo na mangangasiwa sa pagpapagiling at pamamahagi ng bigas.

Sinabi ni Gov. Oyie isang pamamaraan ito upang maiparamdam sa mga mamamayan ang tunay na malasakit ng PhilRice at ng provincial government sa kabila ng kinahaharap na pandaigdigang krisis sa kalusugan.

Dagdag ng gobernador, hindi lamang ito ang unang pagkakataon na naging katuwang ng kapitolyo ang naturang institusyon sa pagbibigay ng serbisyo sa mga mamamayan dahil lagi silang nariyan upang sumuporta sa iba pang programa ng lalawigan.- Ulat ni Jovelyn Astrero

Watch here: Nagdonate ng 3,000 na sako ng palay na may timbang na 20 kilo per bags ang Philippine Rice Institute (PhilRice)

Ordinansa ng Cabanatuan City sa pagpapatupad ng ECQ, salungat sa “Bayanihan to Heal as one Act” at DILG Memos

Salungat umano sa isinasaad ng Republic Act 11469 o mas kilala bilang “Bayanihan to Heal as one Act” at mga inilabas na direktiba ng Department of the Interior and Local Government (DILG) ang ipinasa at ipinatupad na Ordinance 026-2020 o “An ordinance Adopting the additional policies and guidelines on the implementation of the Enhance Community Quarantine” ng Cabanatuan City.

Ito ang inihayag ng Sangguniang Panlalawigan ng Nueva Ecija at Provincial Legal Office sa programang Malasakit sa Kalusugan COVID-19 updates sa TV48 noong April 30, 2020.

Paglilinaw ni Vice Governor Anthony Umali, naaayon sa isinasaad ng batas ng pamahalaang nasyunal ang mga dahilan kung bakit nila ibinasura ang naturang ordinansa, kontra sa ibinibintang ng City Government na sila ay namumulitika lamang.

Ang tinutukoy na mga maling probisyon ay ang pagpapatupad ng Curfew hours ng City Government ng 5pm-5am na hindi tugma sa isinasaad na bente kwatro oras na Curfew hours ng DILG Memorandum Circular 2020-062.

Maging ang pagbabago ng Market Hours mula 5am hanggang 11am at 11am hanggang 4pm ng bawat barangay ay direktang nagpapakita umano ng hindi pagsunod sa inilabas na advisory ni DILG Sec. Eduardo Año na dapat tanggalin ng mga Local Government Unit ang window hours sa pamimili.

Habang tinutulan naman ng SP ang pagtatakda ng mga piling araw kung kailan lamang maaaring makapasok sa Cabanatuan City ang mga hindi residente ng lungsod.

Lihis din aniya sa mandato ng Bayanihan Act ang paglalagay ng mga harang gaya ng buhangin na hindi akma sa panahon ng emergency at pagtatayo ng barikada sa mga kalsada na nagdudulot ng pagsikip ng daloy ng trapiko na nagreresulta sa pagkaantala ng delivery ng mga pagkain at essential goods.

At panghuli, mababalewala rin daw ang ipinatutupad na quarantine at social distancing kung madalas ang pagpapalit ng quarantine pass dahil dadagsa ang mga tao sa barangay hall upang kumuha nito araw-araw.

Isa pang dahilan kung bakit invalid ang ordinansa ay walang maipakitang katunayan ang City Government na ang nasabing ordinansa ay nailathala sa lokal na pahayagan o dyaryo na isinasaad sa Article 114 ng Implementing Rules of the Local Government Code.

Pakiusap ng Bise Gobernador sa mga namumuno sa Lungsod ng Cabanatuan, huwag masamain ang ginawang pagtatama sa ordinansa dahil hindi ito ang panahon ng pamumulitika kundi ito ang pagkakataon upang magkaisa para labanan ang pandemya na dulot ng COVID-19. -Ulat ni Danira Gabriel

Watch here: Ordinansa ng Cabanatuan City sa pagpapatupad ng ECQ, salungat sa “Bayanihan to Heal as one Act” at DILG Memos

Isyu ng viral post ng mga frontliners na natutulog sa labas ng isang motel sa Cabanatuan City, binigyang linaw

Isyu ng viral post ng mga frontliners na natutulog sa labas ng isang motel sa Cabanatuan City, binigyang linaw

Nilinaw ni Bert Dysangco na isang nurse, sa kanyang video na walang kinalaman at hindi dapat sisisihin ang pamahalaang panlalawigan sa pamumuno ni Governor Aurelio Umali sa naging kalagayan ng mga frontliners sa Ms Tee Motel sa Cabanatuan City.

Si Dysangco ay isa sa mga frontliners na kinunanan ng larawan habang natutulog sa labas ng naturang motel. – Ulat ni Jovelyn Astrero

Panoorin ang buong balita: https://www.facebook.com/watch/?v=238406254046807

Pagsisimula ng klase sa 2020-2021, posibleng mailipat sa buwan ng Agosto

Inanunsiyo ni Department of Education (DepEd) Secretary Leonor Briones sa kanyang eksklusibong panayam sa CNN Philippines ‘The Source’ ngayong araw, April 21 na maaaring mailipat ang simula ng klase ng S.Y. 2020-2021 sa buwan ng Agosto.

Sa pahayag ng kalihim, base sa kaniyang pagkonsulta sa iba’t ibang ahensiya ng bansa ay posibleng maging Agosto na ang pagbubukas ng klase at tinitingnan rin ang posibilidad ng stay-at-home classes tuwing sabado upang mahabol ang orihinal na iskedyul sa susunod na school year.

Dagdag pa ni Briones, hinihintay pa ng DepEd ang iba pang rekomendasyon o suhestiyon ng COVID-19 Inter-Agency Task Force ukol sa mga ipapatupad na panuntunan sa mga paaralan.

Inabisuhan naman ni Briones ang mga paaralan na magsasagawa ng ‘e-graduation rites’ na mag-ingat at siguraduhing walang kahit anong physical contact sa gagawing seremonya matapos nilang ihayag na postponed ang graduation rites para sa mga magsisipagtapos ngayong taon. – ulat ni El dela Cruz

Read more: https://www.facebook.com/ne.tv48/photos/a.1310069332404037/2764606543616968/?type=3&theater

Libreng tirahan, pagkain ng frontliners, tinugunan ng Nueva Ecija Intet-Agency Task Force

May libreng pagkain at maayos nang matitirhan ang mga frontliners na mga nurses, nursing attendant, security guards ng PJG Hospital na sagot ng pamahalaang panlalawigan.

April 16, 2020 sa programang Usapang Malasakit sa Lipunan ipinarating kay Governor Aurelio Umali ang post sa Facebook ng isang nurse kung saan makikita ang mga kasamahan nitong nurses at nursing attendants na natutulog sa labas ng Ms Tee Motel sa Cabanatuan City dahil walang aircon at sobrang init ng kanilang kwarto doon.

Kaagad pinaimbestigahan ni Gov. Oyie ang insidente at personal din syang nagtanong sa nurse gamit ang kanyang personal account sa Facebook kaya napag-alaman niyang ang mga ito ay mga frontliners ng PJG na katatapos lamang magduty at kailangan ng magpahinga at magquarantine bilang pagsunod sa protocol ng DOH.

Kinabukasan ay kaagad pinapuntahan ng gobernador kay Nueva Ecija Inter-Agency Task Force spokesperson Father Arnold Abelardo ang mga ito upang bigyan ng counseling at dasal upang maipadama sa kanilang hindi sila nag-iisa sa laban kontra COVID-19.

Nang araw ding iyon ay inilipat na sila sa mas maayos na Hotel sa Cabanatuan City, may sariling kwarto ang bawat isa sa kanila at may libreng pagkain na sagot ng provincial government, kaya labis ang kanilang pasasalamat sa malasakit at agarang pagtugon ni Governor Oyie sa kanilang sitwasyon.

Binigyan din ni Gov. Oyie ng hiwalay na matutuluyan sa Village Inn Hotel sa Cabanatuan City ang mga displaced health workers na active on duty ng PJG Hospital upang may mauwian sila pagkatapos ng kanilang duty at pinagkalooban din sila ng malasa “kits” (hygiene kits) at libre rin ang kanilang mga pagkain.

Ayon kay Provincial Tourism Officer Atty. Jomar San Pedro, Vicenticos ang nagdeliver ng agahan ng mga frontliners ng dalawang araw habang sa unang gabi ay nagdonate naman ng hapunan ang Rotary of Cabanatuan North, sa kasalukuyan ay naroon na aniya ang cook ng Village Inn Hotel na siyang nagluluto ng kanilang pagkain mula umaga hanggang gabi.

Sa panayam naman ng Balitang Unang Sigaw kay Rosemarie Cabuhat, nurse sa PJG Hospital ay sinabi nitong malaking bagay na nabigyan sila ng pansamantalang matutuluyan ni Gov. Oyie dahil madalas silang nakararanas na pandirihan ng mga kapitbahay sa tuwing uuwi sila ng kanilang tahanan.

May pangamba din aniya sa kanyang puso sa tuwing uuwi ng bahay na baka may hindi magandang gawin sa kaniya ang kanilang mga kapitbahay dahil sa takot at pag-aakalang infected na siya ng virus.—Ulat ni Jovelyn Astrero