24.3 milyong estudyante nakapag enroll sa public at private schools

Umabot na sa 24.53 milyon ang bilang ng mga estudyante na nag-enroll sa mga pampubliko at pribadong paaralan sa kabila ng pandemyang COVID-19 para sa darating na October 5, 2020 School Year 2020-2021.

Base sa datos na ipinakita ng Department of Education as of September 21, 2010 ay mayroon nang 22.36 milyong mga mag-aaral ang nagpatala sa mga public schools habang 49.3% naman ang nag-enroll sa mga pribadong paaralan.

Sa mga public schools ay nasa 1.6 million na ang  nakapagpatala sa kindergarten; 11.2 milyon sa elementarya; 6.8 milyon sa Junior High School; 2.05 milyon sa Senior High School at 884, 027 naman sa Alternative Learning System (ALS). 

Dahil sa COVID-19 ay maraming kabuhayan ang naapektuhan at pansamantalang itinigil.

Ilan lang ito sa itinuturong sanhi kung kaya’t 398, 933 mag-aaral mula sa pribadong paaralan ay minabuting lumipat na lamang sa pampublikong eskwelahan upang maituloy pa rin ang pag-aaral.

Matatandaan na sa pamamagitan lang ng text, email o online messaging  isinagawa ang enrollment ng mga estudyante upang maiwasan na umano ang physical contact at patuloy na pagkalat ng Coronavirus disease.

Bunsod ng banta ng COVID-19 ay magsasagawa na lamang ang DepEd ng remote learning sa darating na pasukan upang ang mga mag-aaral ay hindi kailanganin pang tumungo sa paaralan.

Sa pamamagitan ng self-learning modules, broadcast media at internet ay ihahatid ng mga guro ang bawat aralin sa kanilang mga estudyante. Ulat ni Belle Ramirez

https://youtu.be/L9Pwo4TVjRA

NFA-Nueva Ecija, patuloy na namimili ng aning palay ng mga magsasaka

Umaabot na sa 33, 640 na bags ng palay ang nabibili ng NFA o National Food Authority sa lalawigan ng Nueva Ecija as of today September 24, 2020.

Sa ating panayam kay Provincial Manager NFA-Nueva Ecija Antonio Puno, inihayag nito na mayroon silang pondong 461 Million pesos na nakalaan upang mabili ang target nilang 485 thousand bags ng palay.

Hinihikayat nito ang mga magsasaka na magbenta sa kanila ng tuyo at malinis nang palay sa halagang 19 pesos kada kilo.

Para makapagbenta ng palay ay kinakailangan na sila ay mga lehitimong magsasaka.

Ang mga individual farmers naman na magbebenta ay dapat na nakatala ang pangalan sa listahan ng RSBSA o Registry System for Basic Sectors in Agriculture na makukuha sa mga City or Municipal Agriculture Office.

Ang mga kooperatiba naman ay kinakailangang mayroong master list ng mga miyembro, passbook at certification mula sa rin sa mga Agricultural Office ng inyong lungsod o bayan.

Mayroong mga buying station o bodega ang NFA sa Aliaga, Bongabon, Gapan City, Guimba, Munoz at Talavera kung saan maaaring dalhin at ibenta ng mga magsasaka ang kanilang produktong palay.

May mga trucks naman umano silang ginagamit na panghakot ng mga nabibiling palay sa mga malalayong lugar tulad ng Carranglan, Lupao at Nampicuan. Ulat ni Myrrh Guevarra

Kontribusyon ng mga magsasaka at mangingisda, binigyang pagkilala ni DA Ambassador James Reid

Binigyang pagkilala ni Food Security Ambassador James Reid ang kontribusyon ng mga magsasaka at mangingisda para sa bansa, sa kanyang naging talumpati sa harvest festival ng mga benepisyaryo ng PAG-AHON Project o Sa Palay at Gulay, May Ani, Hanapbuhay, Oportunidad at Nutrisyon, na ginanap sa Lupao, Nueva Ecija, noong September 23, 2020.

Tungkulin ng isang Ambassador na suportahan ang mga magsasaka at mangingisda na pangunahing nagdadala ng pagkain sa hapag ng bawat pamilya.

Pinasalamatan ni James ang mga ito na itinuturing niyang back bone o nagsisilbing lakas ng ekonomiya ng bansa dahil sa kanilang kasipagan na hindi aniya nabibigyan ng sapat na pansin.

Kasama ni Reid sa pagdalo sa naturang event si Department of Agriculture Secretary William Dar na hinarap ang mga farmer-beneficiaries mula sa Lupao Vegetable Grower’s Association.

Sa pangunguna ng Department of Agriculture-Philippine Rice Research Institute inilunsad ang PAG-AHON project noong May 11, 2020 upang masustenahan ang pagkain ngayong may pandemya sa pamamagitan ng pagtatanim ng iba’t ibang gulay para tumaas din ang kita ng mga magsasaka.

Buwan din ng Mayo nang i-anunsyo ni James sa kanyang Instagram na makakatrabaho nito ang kalihim bilang Food Security Ambassador ng Department of Agriculture.

Paliwanag ni Secretary Dar na kailangan nila ng boses ng mga kabataan na katulad ni James Reid na isa sa mga sikat at hinahangaang artista para ma-endorso ang pangunahing adbokasiya ng ahensya lalo na sa kampanya nila para sa sustenableng seguridad sa pagkain at abot-kayang pagkain.— Ulat ni Jovelyn Astrero

2.64 million pesos inilaan ng NIA-UPRIIS, sa cloud seeding para sa Pantabangan Dam

Naglaan ang National Irrigation Administration – Upper Pampanga River Integrated Irrigation System (NIA-UPRIIS) ng 2.64 million pesos na pondo na nagmula sa kanilang calamity fund para magamit sa cloud seeding upang mapataas ang lebel ng tubig ng Pantabangan Dam.

Sa panayam ng Balitang Unang Sigaw kay NIA-UPRIIS Regional Manager Engineer Rosalinda Bote, sinabi nito na ang proseso ng cloud seeding ay nagsisimula sa 100 spotter na kinomisyon ng ahensya upang kumuha ng litrato ng mga ulap na ipadadala at pag-aaralan ng Bureau of Soils and Water Management ng Department of Agriculture.

Kapag ito ay pumasa sa kanilang assessment ay lilipad ang carrier dala ang mahigit 15 – 20 sako ng asin upang mag dulot ng pag ulan.

900 bags ng asin, gagamitin sa cloud seeding sa Pantabangan Dam

Sinimulan na ngayong buwan ng Setyembre ang cloud seeding kung saan ang 900 na sako ng asin na isasabog sa mga ulap ay maaaring magamit sa loob ng 30 araw na pagpapa-ulan.

Level ng tubig sa Pantabangan Dam, mas mababa ng 18 meters ngayong taon

Paliwanag ni Engr. Bote, malaki ang ibinaba ng tubig ng Pantabangan Dam kumpara noong nakaraang taon. Aniya ang taas ng tubig noong 2019 para sa buwan ng Setyembre ay umabot sa 201 meters ngunit ngayong taong 2020 sa kaparehong buwan ay nasa mahigit 182 meters pa lamang ito na mas mababa ng 18 metro.

Pantabangan Dam, nagseserbisyo sa 140, 000 hectares (Photo courtesy: NIA-UPRIIS)

Dagdag pa ni Engineer Rosalinda kung hindi nila maabot ang kanilang quota na 210 meters water elevation ng Pantabangan Dam para sa buwan ng Oktubre ay kukulangin ang pondong tubig para sa susunod na dry season kaya may posibleng hindi ma suplayan ang mahigit na 140,000 hectares service area nito.

Bukod sa cloud seeding, inaasahang makatutulong ang La Niña kung matutuloy ito ngayong buwan ng Oktubre hanggang Desyembre upang tumaas ang lebel ng tubig ng Pantabangan Dam. – Ulat ni Amber Salazar

Mga tindera ng damit na naapektuhan ng sunog sa palengke ng Cabanatuan City, inilipat sa bantayog ni Gen. Luna

Pansamantalang inilipat ng Pamahalaang Lungsod ng Cabanatuan sa kinatatayuan ng bantayog ni Heneral Luna sa Plaza Lucero ang mga tindero at tindera ng mga damit na naapektuhan ng pagkasunog ng Pampublikong Pamilihan ng nasabing lungsod noong April 2020.

Makikita na iilan pa lamang sa mga stalls o espasyo na inilaan para sa mga vendors ang naookupahan at binubuksan.

Sa ating panayam kay Janice Paulo, nakatira sa Brgy. Pagas, Cabanatuan City, ay sinabi nito na nagsimula silang magbukas dito noong September 1, 2020 at sa kasalukuyan ay wala naman silang binabayarang renta.

Kwento niya, nang masunog noong buwan ng Abril ang itaas na bahagi ng palengke kung saan sila nakapwesto ay halos limang buwan silang natengga sa pagtitinda kaya sumubok silang magtinda online ngunit sa dami na raw ng mga online seller ngayon ay wala rin sila halos kita.

Pinakamalakas na rin aniya ang 1, 000 pesos na benta sa isang araw at nasa 200-300 pesos dito ang kanilang kita, pero minsan nararanasan nila ang mabokya o uuwi nang walang-wala talaga.

Ayon naman kay Denver Dunluan, mula sa Brgy. Nabao, Cabanatuan City, kabubukas lamang nila ng kanilang pwesto noong September 16, 2020 at ang iba pang kapwa nila tindero at tindera ay hindi pa makapagbukas dahil sa kakulangan ng puhunan o pagpapaayos ng kanilang pansamantalang lilipatan.

Maulan nang bumisita ang Balitang Unang Sigaw sa Plaza Lucero at halos magtatanghali na ay wala pa ring mga mamimili na nagpupunta.— Ulat ni Jovelyn Astrero

Ilang magsasaka sa Talavera, Nueva Ecija, nananawagang itaas ang presyo ng palay

Nananawagan sa gobyerno ang ilang mga magsasaka dito sa bayan ng Talavera, Nueva Ecija na sana ay pataasin ang presyo ng palay ngayong first o wet cropping season.

Pumapatak lang kasi sa kasalukuyan sa P13.00 ang farm gate price ng ordinary variety habang P14.00 naman kada kilo ang hydrid o long grain na klase ng palay.

Bagaman inaasahang mas mababa talaga ang presyo ng palay kapag wet season dahil sa mataas ang moisture content nito ay sobrang bulusok naman ang halaga nito kumpara noong nakaraang taon na nasa P14.00 ang ordinary samantalang P16.00 naman ang hydrid.

Sa panayam ng Balitang Unang Sigaw kay G. Rudy Bernardo, lider ng Modern Farmers of Talavera Association, idinaing nito ang pagkalugi ng mga magsasaka sanhi umano ng Rice Tariffication Law at mataas na halaga ng farm inputs tulad ng pataba.

Paliwanag nito na dahil sa pagbaha ng imported na bigas sa merkado kaya bumababa ang presyo ng ating lokal na produkto.

Binigyang diin nito ang panawagan na sana ay bilhin ng Department of Agriculture sa pamamagitan ng NFA o National Food Authority sa P15.00 hanggang P16.00 ang palay ng magsasaka imbes na P19.00 na linis na at napatuyo na.

Problema rin kasi aniya ng mga magsasaka ang mga postharvest facility gaya ng pagbibilaran o pagpapatuyuan ng palay lalo na ngayong tag-ulan.

Hiling ni Bernardo sa mga kongresista lalo na rito sa Nueva Ecija na tinaguriang Rice Granary of the Philippines na kung hindi man ma repeal ang RTL sana ay maamyendahan man lang ito o magkaroon ng probisyon na itigil ang pag-aangkat ng bigas sa panahon o tuwing anihan para hindi naman nalulugi ang mga magsasaka.-ulat ni Clariza de Guzman

Pamamahagi ng free wifi connection sa mga paaralan at barangay sa Nueva Ecija, aprub na sa SP

Binigyan ng awtoridad sa ika tatlumpo’t dalawang regular na sesyon ng Sangguniang Panlalawigan ng Nueva Ecija sa pamumuno ni Vice Governor Doc Anthony Umali si Governor Aurelio Umali bilang kinatawan ng pamahalaang panlalawigan upang makapagpamahagi ng Wireless Network Infrastructure sa limampong paaralan sa ilalim ng Department of Education – Division of Nueva Ecija at 181 barangays.

Nakapaloob sa Memorandum of Agreement sa pagitan ng gobernador at mga benepisyaryo ang kanilang magiging tungkulin, mga dapat tandaan, sundin at pangalagaan sa pagtanggap ng hardware component ng nasabing wireless network kung saan kabilang ang routers, access points, switches and adapter.

Layunin ng programang ito na suportahan ang mga pampublikong paaralan sa lalawigan sa darating na pasukan ngayung Oktubre, 2020 na magpapatupad ng new online at blended learning modalities dahil hindi pa rin pinapayagan ang face to face classes para makaiwas sa pagkalat ng pandemyang COVID-19.

Samantalang ang mga pamahalaang barangay na mayroong CCTV o closed circuit television na mapagkakalooban ng WIFI connection ay magkakaroon ng pagkakataong mabigyang access ang Provincial Disaster Risk Reduction and Management Office sa pagresponde sa panahon ng kalamidad, sakuna at emergencies na nangangailangan ng agarang aksyon.

Ayon kay Vice Governor Umali, pipilitin ng kapitolyo na mabigyan ng Wireless Network Infrastructure ang lahat ng mga barangay sa Nueva Ecija

Ang nasabing programa ay may nakalaan umanong pondong 72 million pesos at nakapaloob sa proyektong pagtatayo ng Command Center ng pamahalaang panlalawigan na iprinesenta ng PDRRM Council sa ginanap na Joint Council meeting ng Local Special Bodies kasama ang mga alkalde ng lalawigan noong ika-29 ng Hunyo, sa Sierra Madre Suites, Palayan City.— Ulat ni Nathaniel Isaac Jose

Mga proyekto ng pamahalaang panlalawigan sa Zaragoza, patuloy kahit may pandemya

Patuloy pa rin ang konstruksyon ng mga pagawaing proyekto ng Pamahalaang Panlalawigan ng Nueva Ecija sa pamumuno ni Governor Aurelio Umali sa bayan ng Zaragoza kahit na may pandemya.

Zaragoza Coliseum, nagsilbing quarantine facility

Isa na rito ang Zaragoza Coliseum na may kapasidad na 2,000 hanggang 3,000 na katao na matatagpuan sa likod ng munisipyo na sinimulang ipagawa pag-upo ni Mayor Efren Nieves.

Sa aming panayam kay Mayor Nieves, sinabi nito na bagaman kailangan pang lagyan ng mga air conditioning unit ay nagamit na ang coliseum bilang repacking facility nang magkaroon ng kalamidad noong March 27, 2020 at quarantine facility ng labing siyam na pulis na nag positive sa COVID-19.

3 gymnasium, kasalukuyang itinatayo sa Bayan ng Zaragoza

Kasalukuyan ding itinatayo ang tatlong gymnasium sa Zaragoza, isa na rito ang nasa barangay Sta. Lucia Old Elementary School.

Nagmula umano ang budget sa Special Educations Fund na nagkakahalaga ng mahigit 3.8 million pesos.

Paliwanag ni Mayor Efren, wala mang klase ngayon ay magagamit pa rin ang mga pasilidad na ito bilang mga evacuation center kapag nagkakaroon ng bagyo at pagbaha.

Jaen-Lambakin- Zaragoza Road at Marawa bridge approach, isinasaayos

Patuloy din ang pagsasaayos ng Jaen-Lambakin- Zaragoza Road at Marawa bridge approach na nagdurugtong sa mga bayan ng Zaragoza at Jaen.

Isa si Joselito Espiritu, Deputy Bantay Bayan sa Marawa sa natutuwa dahil dating sobrang baku-bako ang daan na ito na nagiging sanhi ng pagkasira ng kanilang mga motorsiklo.

Umaabot naman umano sa 6.9 million pesos ang road rehabilitation/ improvement project na ito na galing sa twenty percent Development Fund ng pamahalaang panlalawigan. – Ulat ni Amber Salazar

https://www.youtube.com/watch?v=ZwEiL8f72ZA&feature=youtu.be

Halos 100 Novo Ecijano, target ng pamahalaang panlalawigan na pagkalooban ng Micro-Layering program

Target ng pamahalaang panlalawigan sa pamumuno ni Governor Aurelio Umali na gawing benepisyaryo ng Micro-Layering Program ang halos 100 Novo Ecijano sa darating na Nobyembre hanggang Disyembre ngayong taong 2020.

Ito ay matapos na magkaloob ang Department of Labor and Employment noong September 8, ng dalawang milyong piso bilang karagdagan sa pondo ng naturang programa na mahigit 1.8 milyong piso.

Tugon ito sa kahilingan ni Governor Umali sa DOLE na suportahan ang kapitolyo upang mas dumami pa ang mamamayan ng Nueva Ecija na makikinabang dito.

Ang Micro-Layering Program ay isang proyekto ng provincial government na nagbibigay sa mga nagangailangang Novo Ecijano ng alagang paitluging manok bilang alternatibong pagkakitaan lalo na ngayong may pandemya.

Ayon kay DOLE Provincial Director Maylene Evangelista na nagkakahalaga ng mahigit 38,000 pesos ang presyo nito kung saan kasama ang pagkain, gamot at kulungan ng mga manok.

Ang mga mamamayang walang trabaho, natanggal sa trabaho at walang pinagkakaabalahan dahil sa pagkakaroon ng COVID-19 ang nais na mabigyan ng pagkakataon na kumita sa pamamagitan ng nasabing proyekto kahit nasa tahanan lang sila.

Sa mga interesadong mapabilang sa programang paitluging manok ay magtungo lamang sa tanggapan ng Nueva Ecija PESO sa pamumuno ni Manager Ma. Luisa Pangilinan upang magabayan kayo sa kinakailangang proseso.

Tiniyak naman ni PESO-Manager Pangilinan na patuloy ang kanilang pagsisikap para matulungan na makapag hanap-buhay ang mga kalalawigan habang naka quarantine upang makaiwas na mahawa sa coronavirus. Ulat ni Belle Ramirez

https://www.youtube.com/watch?v=JeZGCAtRTwk&feature=youtu.be

Online classes ng ELJMC, maayos ang takbo

Masayang ibinalita ng pamunuan ng ELJ Memorial College sa Palayan City, Nueva Ecija na maayos ang takbo ng kanilang online classes na nasa ikatlong linggo na para ngayong School Year 2020-2021.

Sa panayam ng Balitang Unang Sigaw kay Dr. Marriel Cruz, Presidente ng ELJMC ay inihayag nitong full online ang kanilang klase sa pamamagitan ng google classroom at google meet.

Dr. Marriel Cruz, President of ELJ Memorial College

Kaya naman napakikinabangan na nila ang libreng internet subscription na ipinagkaloob ng Pamahalaang Panlalawigan ng Nueva Ecija sa pamumuno ni Governor Aurelio Umali.

May tatlong mag-aaral lamang ani Dr. Cruz ang nagmodular dahil sa mahinang koneksyon ng internet sa kanilang mga lugar.

Imbes naman umano na bumaba ang bilang ng kanilang mga enrollees’, ay tumaas pa ito dahil kumpara noong School Year 2019-2020 na nasa 814 ang mga nag-enroll ngayong taon ay umabot ito sa 975.

Paliwanag ni Dr. Marriel, hahatiin ang 18 linggo ng kanilang unang semestre, halimbawa, ang isang estudyante ay may 8 subjects o asignatura, tatlo lamang dito ang patutukan sa kanya sa loob ng unang anim na linggo ng first semester at ang natitira pang tatlong subjects ay sa susunod na anim na linggo na.

Sa ganitong sistema ay maiiwasang mababad sa gadgets ang mga kabataan dahil tig-dalawang oras lang ang kailangan nilang ilaan bawat subject.

Virtual graduation naman ang tugon ng pamunuan ng ELJMC para sa kanilang mga magsisipagtapos na naranasan an g 115 na mga gumraduate noong nakaraang School Year 2019-2020.— Ulat ni Jovelyn Astrero

Motibo sa pagpatay sa staff ni Former Nueva Ecija Governor Cherry Umali, inaalam pa ng awtoridad

Inaalam pa rin umano ng mga awtoridad ang motibo at mastermind sa likod ng pagpatay sa staff ni Former Nueva Ecija Governor Cherry Umali mahigit dalawang taon na ang nakalilipas.

Ito ang inihayag sa panayam ng Balitang Unang Sigaw kay PLTCOL Heryl Bruno, Chief of Police ng San Jose City sa panayam ng Balitang Unang Sigaw.

Nito lamang September 5, 2020 ay hinuli ng mga pulis sa bisa ng warrant of arrest ang trenta anyos na si Ronald Magat y Geron, residente ng Tondod, San Jose City na itinuturong lookout umano sa pamamaril kay Mary Anne Hernandez, Chief Administrative Officer ng pamahalaang panlalawigan, sa Shell Gas Station sa bayan ng Talavera noong January 14, 2018.

Ayon kay PLTCOL Bruno, inaasahang makatutulong si Ronald para pagdugtung-dugtungin kung paano pinlano at isinagawa ang nasabing krimen at upang maresolba na ito.

Matatandaan na January 25, 2018 nauna nang nadakip at kinasuhan ng Murder at Frustrated Murder ng Special Investigation Task Force Hernandez ang mag-amaing Anastacio at Armando Geron Jr. kasama rin dito si Reynaldo Iglesias na sumuko naman sa kapulisan.

Napag-alaman na magkakamag-anak at magkakapit-bahay ang apat na mga suspek at gun for hire umano ang kanilang hanap-buhay.

 Sinubukan nating kunin ang panig ni Ronald na kasalukuyan pa ring nakakulong dito sa custodial facility ng San Jose City Police Station ngunit tumanggi itong magpa interview.- ulat ni Clariza de Guzman

Mga checkpoints sa mga borders ng Nueva Ecija, mahigpit pa rin sa ilalim ng Modified GCQ

 Mahigpit pa rin ang mga checkpoints sa mga borders ng lalawigan ng Nueva Ecija kahit na nasa ilalim na ito ng Modified General Community Quarantine.

Ito ay alinsunod sa atas ng Nueva Ecija Inter-Agency Task Force sa pamumuno ni Governor Aurelio Umali upang mapigilan ang patuloy na pagtaas ng positibong kaso ng COVID-19 sa lalawigan.

Sa programang Usapang Malasakit sa Lipunan noong September 10, 2020 ay sinabi ni Governor Oyie na patuloy pa rin ang paghihigpit sa mga checkpoints papasok ng lalawigan at malaki aniya ang ibinaba ng COVID-19 positive patients dahil dito.

Kanina ay ating nakausap si Police Captain Wilson Kimmayong, Platoon Leader ng First Platoon PMFC-NEPPO, at sinabi nitong katuwang nila sa pagbabantay sa checkpoint ang Gapan City Police Station at City Health Representatives.

Maliban kasi sa paghingi ng health certificate at travel authority sa mga pumapasok sa lalawigan ay mahigpit ding pinamomonitor ng City IATF na masusunod ng mga residente ng Gapan City na uuwi sa kanilang tahanan na galing Manila o saan man sa labas ng Nueva Ecija ang 14 days quarantine.

Sa naging panayam naman ng Balitang Unang Sigaw kay Col. Marvin Joe C. Saro, Provincial Director ng Nueva Ecija Police Provincial Office, mayroong labing dalawang fixed quarantine boarder control points na binabantayan ng ating mga kapulisan nang 24 oras sa probinsya.

 Ayon kay Col. Saro, lahat ng mga pumapasok sa lalawigan ay hinahanapan nila ng health clearance at kapag not APOR o Unauthorized Person Outside Residence ay hinahanapan naman nila ng travel pass.

Maging ang mga nagdedeliver ng mga essentials tulad ng mga pagkain, gamot, at mga produktong pang agrikultura ay hinahanapan din nila ng travel authority at lahat naman daw ay nakakapag-comply.

Maliban sa labing dalawang quarantine border control points ay mayroon ding checkpoints per cities and municipalities para sa counter check o masiguro at masala ang mga pumapasok sa probinsya.

Mahigpit pa rin ang kanilang pagmomonitor sa mga magkaangkas sa motor kung saan ang mga mag-asawa lamang ang pinapayagan, sa tricycle naman ay dapat daw ay isa lang din ang sakay sa loob.— Ulat ni Jovelyn Astrero

Presyo ng produktong petrolyo sa Gapan City, Nueva Ecija

Good news para sa ating mga motorista dahil noong nakaraang Martes Sept, 2020 ay nagpatupad ng bawas presyo sa petrolyo ang Big 3 na Shell, Caltex at Petron.

Sa Diesel bumaba ng 0.45 centavos bawat litro habang 0.30 naman sa gasolina kada litro.

Bagaman bahagyang bumaba ang presyo ng gasoline,a malungkot parin ang ating mga kaibigang tricycle drivers sa Gapan City dahil halos wala pa rin silang kita sa maghapong pamamasada ng tricycle.

Ang iba ay halos alas singko palang ng umaga ay nakapila na para kahit papaano kapag wala pang byaheng jeep papuntang bayan ay makakuha man lang ng pasahero.

Kung dati kumikita sila ng 500 pesos isang araw ngayon ay halos 150 nalang, at kung dati nasa 50 miembro ang nakapila ngayon ay halos 12 to 15 na tricycle nalang.

Ang nakakalungkot lang, karamihan sa mga miembro ng SRB TODA ay nabatak na ang kanilang mga pinamamasadang tricycle dahil nga wala ng pasaherong maisakay kaya wala nang kakayahang magbayad o maghulog ng kanilang motor.- ulat ni Smile Supetran III

Mayor ng San Antonio, Nueva Ecija, muling nakaligtas sa ambush

Nakaligtas na muli sa ambush si Mayor Arvin Salonga ng bayan ng San Antonio, Nueva Ecija kahapon September 8, 2020.

Mahigit kumulang nasa walong bala ng caliber 9mm na baril ang tumama sa kulay itim na SUV Toyota Land Cruiser na minamaneho ni Mayor Salonga, na isa rito ay dumaplis sa kanyang katabing bodyguard  na si Danny Camelo, 53 years old, na nagtamo ng sugat sa leeg.

Base sa salaysay ni Mayor Salonga, bandang alas otso bente singko ng umaga habang binabagtas nila ang kahabaan ng Jaen-San Leonardo bridge sa barangay Apo Esquivel, bayan ng Jaen nang paputukan sila ng sunud-sunod  ng gun man na nakaangkas sa isang Honda XRM na motorsiklo na walang plate number.

Dahil dito ay binilisan umano ng alkalde ang pagmamaneho sa kanyang sasakyan hanggang makauwi sila sa kanilang bahay kung saan ginamot ang sugat ng kanyang bodyguard.

Sa panayam ng Balitang Unang Sigaw, sinabi ni Mayor Arvin na wala naman siyang nakikitang dahilan o sinumang may motibo para siya ay paslangin.

Nakita sa nakuhang CCTV footage na mabilis na tumakas ang mga suspek na riding in tandem patungong direksyon ng San Leonardo.

Narekober  naman ng SOCO ang labindalawang basyo ng bala ng 9mm sa tulay ng Jaen-San Leonardo.

Ayon kay Col. Marvin Joe Saro, OIC- Nueva Ecija Provincial Police Director, lahat ng posibleng anggulo ay kanilang iimbestigahan upang matukoy ang salarin sa pag-atake kay Mayor Arvin.

Hindi naman ito ang unang pagkakataon na pinagtangkaan ang buhay ng alkalde ng San Antonio.

Taong 2017 nang mahuli ng mga awtoridad ang isang retired police at kasama nito na binayaran umano para patayin si Salonga.

Swab testing booths mula sa pamahalaang panlalawigan, tinanggap ng tatlong bayan

Tinanggap ng tatlong bayan sa lalawigan ng Nueva Ecija ang mga swab testing booths o confirmatory test para sa COVID-19 mula sa pamahalaang panlalawigan noong September 3, 2020.

Isa rito ay ipinagkaloob sa Gapan District Hospital, isa sa DepEd Sta. Rosa at isa naman sa San Antonio District Hospital.

Ayon kay Dra. Adora Hernal Cruz Chief of San Antonio District Hospital, sa pamamagitan nito ay libreng maseserbisyuhan o masusuri ang mga Novo Ecijanong suspected case o makararamdam ng sintomas ng COVID-19.

Una nang nabigyan ng swab testing booths ang Guimba District Hospital, Guimba Community Hospital, Sto. Domingo District Hospital at ELJ Memorial Hospital noong nakaraang August 28, 2020.

Kasunod ang Palayan City Health Office, Bongabon District Hospital, San Jose City General Hospital at Science City of Munoz noong September 4, 2020.

Maging Nueva Ecija Police Provincial Office sapagkat madalas na humaharap o exposed sa maraming tao ang kapulisan na itinuturing na mga frontliners ngayong may pandemya.

Sa panayam ng Balitang Unang Sigaw kay Dra. Josefina Garcia, Chief of Provincial Health Office ay sinabi nitong susunod nilang magiging hakbang ang pagtuturo kung paano isagawa ang pagkuha ng swab sample.

Ito ay sa pamamagitan ng online training ng Department of Health Nueva Ecija (DOH-NE) sa mga medical technologist na representante ng bawat ospital sa lalawigan.

Nagpasalamat naman ang mga pamunuan ng mga ospital na tumanggap ng swab testing booth kay Governor Aurelio Umali, dahil malaking bagay umano para sa kanila ang mga ito upang masiguro ang kaligtasan ng mga mamamayan upang makaiwas sa kumakalat na virus.

Matatandaan na ang mga swab testing booths na ito ay ipinagkaloob ng Tau Alpha Fraternity ng University of the Philippines College of Engineering sa pamahalaang panlalawigan noong May 26, 2020. -Ulat ni Myrrh Guevarra