Governor Cherry Umali, personal na inihatid ang maagang pamasko ng PGNE sa Gen. Natividad

Personal na inihatid ng Ina ng Lalawigan Governor Czarina Domingo Umali sa mga residente ng General Natividad ang maagang pamaskong hangdog ng Pamahalaang Panlalawigan sa kanilang Gift Giving Program noong Biyernes, December 7, 2018.

Mula pagsikat hanggang paglubog ng araw ay walang tigil ang Pamahalaang Panlalawigan sa pamamahagi ng munting regalo sa bayan ng General Natividad na labis na ikinatuwa ng mga residente doon.

Sa kabuuan ay umabot sa 14,500 gift packs ang naipamahagi sa 19 barangay kabilang ang Mataas na Kahoy na nabigyan ng 1,650 packs, 900 packs sa Balangkare Norte at Sur, 1,050 packs sa Piñahan, 1,180 packs sa Poblacion, 1,970  packs sa Talabutab Norte at Sur habang 900 packs naman ang para sa Barangay Sapang Bato.

2,250 packs ang naipamigay sa mga Barangay Sampaloc, Belen at Platero, 1,405 packs sa Barangay Kabulihan, Pula at Manarog, 1,285 sa Barangay Bravo, Panacsac at Picaleon habang 1,910 packs naman ang ibinahagi sa Barangay Pulong Singkamas at Balaring.

Mismong ang Ina ng Lalawigan ang umikot maghapon at namahagi ng mga regalo sa mga residente ng General Nativdad katuwang sina Doc Anthony Umali, Board Member Macoy Matias at Manong DM Morales.

Layunin ng Gift Giving Program ng Pamahalaang Panlalawigan na mapuntahan ang bawat barangay dito sa probinsya, mabigyan ng munting regalo at maipadama sa mga Novo Ecijano ang malasakit lalo ngayong nalalapit na kapaskuhan.

Sa mensahe naman ni Governor Cherry, pinaalalahan nito ang mga taga-General Natividad na sana ay maging mapanuri at timbangin kung sino ang nagsasabi ng katotohanan.

Itinanggi naman ni Doc Anthony Umali ang isyu na ibinabato sa kanya na hindi na umano siya maaaaring kumandidato at nilinaw na isang fake news lang ito.

Limang taon nang lumilibot at bumababa sa mga barangay ng 27 munisipalidad at limang siyudad ng Nueva Ecija ang Pamahalaang Panlalawigan na sinimulan pa noong November 2013 sa pangunguna ni Former Governor Oyie Umali at patuloy na isinasakatuparan ng kanyang maybahay at kasalukuyang gobernador ng lalawigan, Governor Cherry Umali. –Ulat ni Jessa Dizon

 

12 barangay sa Gabaldon, nabigyan ng maagang pamasko ng PGNE

Sa patuloy na pamamahagi ng maagang pamasko ng Pamahalaang Panlalawigan ay ang mga residente naman ng 12 barangay sa bayan ng Gabaldon ang maswerteng nabigyan sa isinagawang Gift Giving Program noong Lunes, December 3, 2018.

Umabot sa 11,895 gift packs ang naipagkaloob kung saan 844 ang ibinigay sa Brgy. Cuyapa at Pinamalisan, 620 gift packs sa Brgy. Sawmill, 2,394 gift packs naman sa South at North Poblacion, 600 packs sa Brgy. Bantug at Camachile at 1,026 naman para sa Brgy. Bagting.

Habang 1,794 packs sa mga Brgy. Macasandal, Pantoc at Malinao, 2,157 packs sa Brgy. Ligaya at Calabasa, at 2,460 packs naman para sa mga Brgy. Tagumpay, Bagong Sikat at Bugnan.

Pinangunahan ni Doc Anthony Umali ang pamamahagi ng pamaskong regalo katuwang sina Board Member Macoy Matias at Gabaldon Vice Mayor Jobby Emata.

Sinigurado ni Doc Umali sa mga taga-Gabaldon na hindi sila pababayaan ng pamahalaan at tuloy-tuloy pa rin ang matapat na pagseserbisyo sa mga Novo Ecijano.

Tiniyak din ni Doc Umali na ang kanilang paglilingkod sa bayan ng Gabaldon ay walang bahid ng panlilinlang.

Sinimulan ni dating Governor Aurelio Umali na ipinagpatuloy naman ng Ina ng Lalawigan Governor Czarina Umali ang Gift Giving Program na mahigit limang taon nang umiikot sa probinsya para magbigay saya at personal na makadaupang palad ang mga Novo Ecijano at alamin ang iba pang mga pangangailangan nito. –Ulat ni Jessa Dizon

 

Gov. Cherry at Atty. Oyie Umali, nagdiwang ng kanilang anibersaryo kasama ang mga kababaihan sa Bayan ng Guimba

Punong-puno ng kasiyahan at sayawan ang nagkakaisang kababaihan sa Bayan ng Guimba nang bumuhos ang mga sorpresang regalo at papremyo sa kanilang pagdiriwang ng Christmas Party kasama sina Gov. Czarina at Atty. Aurelio Umali noong December 08, 2018.

Sa saliw ng mga katutubong tugtogin habang suot ang mga tradisyunal na kasuotan ay nagpaligsahan sa pagsayaw ang mga grupo ng kababaihan ng iba’t-ibang barangay sa Guimba.

Ang pagdiriwang ay mas lalong pinasaya nina Gov. Cherry at Atty. Oyie Umali na nagdiriwang noon ng kanilang Ika-21 anibersaryo dahil sa kanilang inihandog na sorpresang regalo.

Kinilig ang lahat ng maghandog ng isang munting harana si Atty. Oyie sa kaniyang maybahay.

Lalong nag-umapaw ang saya ng mga kababaihan ng dagdagan nina Gov. Cherry at Atty. Oyie ang papremyo ng kompetisyon.

Ayon kay Atty. Oyie, ang araw na yun ay napakaespesyal para sa kanilang mag-asawa. Kaya’t nais din nilang magbigay ng sobra-sobrang kasiyahan sa mga kababaihan ng Guimba.

Sabay pagbibigay pugay sa kadakilaan na ginagampanan ng mga kababaihan sa bawat tahanan ng pamilyang Novo Ecijano.

Ang kasiyahan ay dinaluhan din nina Ilocos Norte Gov. Imee Marcos, President Dutertes’s Political Adviser na si Francis Tolentino, asawa ni Maguindanao Representative Dong Mangudadatu, doc Anthony Umali, Bokal Raprap Villanueva, Dating Bokal Eric Salazar at Dating Guimba Vice Mayor Ler De Guzman.

Pagkatapos sa Bayan ng Guimba ay dumalo rin sa mga kasiyahan ng araw na yun sina Gov. at Atty. Umali sa mga Bayan ng Talavera at Quezon. –Ulat ni Danira Gabriel

 

Ika-117 Police Anniversary, Ipinagdiwang Ng Neppo; Tv48, pinarangalan

Sa pagdiriwang ng Nueva Ecija Police Provincial Office (NEPPO) sa Ika-117 Anibersaryo ng Pambansang Pulisya ay binigyang pagkilala ang mga opisyal na pulis, units, mayors at iba’t-ibang sektor na nagbigay ng malaking kontribusyon sa pagpapaunlad at pagpapanatili ng katahimikan sa lalawigan ngayong 2018.

Ginawaran ng parangal sa hanay ng pulisya ang labing anim na opisyal na kinabilangan nina PSupt Palmer Tria, Best Senior Police Commissioned Officer for Administration; SPO1 Cristina Duldulao ng Peñaranda Police Station, Administrative PNCO of the year; SPO1 Allan Llobia ng General Tinio, Best Intelligence PNCO at marami pang iba.

Napili bilang Best City Police Station of the Year ang Cabanatuan City, habang Best Municipal Police Station of the Year ang mga bayan ng Talavera, San Leonardo at General Tinio kasabay ang labing walo pang units na binigyan ng iba’t-ibang parangal.

Binigyan ng pagkilala ang Local Chief Executives ng dalawampu’t pitong bayan at limang siyudad sa probinsiya na katuwang ng pulisya sa mga programa upang masugpo ang kriminalidad at mapanatili ang kaayusan at kapayapaan sa buong probinsiya.

Isa naman sa pinagkalooban ng Special Award si Atty. Aurelio Umali, kasama ang iba pang indibidwal mula sa mga barangay, Non-Governmental Organizations (NGOs), religious sector, judiciary, prosecution at NSU’s.

Habang sa media sector ang himpilan ng TV48 ang ginawaran ng pagkilala bilang ka-partner ng NEPPO sa pagbabalita at pagbibigay ng impormasyon sa mga Novo Ecijano.

Ayon kay Acting Provincial Director PSSupt Leon Victor Rosete, ang hamon sa paggampan ng kanilang tungkulin na mapanatili ang kapayapaan at katahimikan sa lalawigan ay hindi mapagtatagumpayan kung wala ang iba’t-ibang sektor na kaagapay sa pagsasakatuparan ng mga programa ng PNP.

Pinuri naman ni League of Municipalities of the Philippines’ (LMP’s) Nueva Ecija Chapter President at Peñaranda Mayor Ferdinand “Blueboy” Abesamis ang ganitong gawain ng PNP.

Aniya, plano ng LMP at NEPPO na magkatuwang na bumuo ng isang programa upang tuluyang mapuksa ang krimen sa lalawigan. Ito ay sa pamamagitan ng pagkakabit ng CCTV sa bawat bayan at lungsod na PNP ang mag-momonitor.

Ang pagdiriwang ay nilakipan ng temang “Pagbabago sa Hanay ng Pulisya Hatid ay Ligtas na Pamayanan Laban sa Korupsyon, Krimen at Iligal na Droga”.–Ulat ni Danira Gabriel

 

Halos 12,000 residente ng Laur, nabiyayaan ng maagang pamasko sa Gift Giving ng PGNE

Umabot sa 11,515 katao ang mga napagkalooban ng maagang regalo sa ginanap na Gift Giving Program sa bayan ng Laur noong December 5, 2018.

Pinangunahan ni Governor Cherry Umali ang pamamahagi ng gift packs sa 17 barangay sa bayan ng Laur kasama sina Doc Anthony Umali, Darrel “Manong DM” Morales, Board Member Peter Marcus “Macoy” Matias, Hector Bayro at mga konsehal ng bayan.

Ayon kay Doc Anthony Umali, isa itong pasasalamat sa mamamayan ng Laur. Bagama’t simple ang regalo na kanilang iniabot ay may kalakip naman itong tunay na pagmamahal at malasakit sa kapwa Novo Ecijano.

Wala aniyang katumbas na halaga ang mapasaya ang kapawa sa bawat proyekto o programang ipinagkakaloob ng Pamahalaang Panlalawigan para sa mga ito.

Pasasalamat naman ang ipinaabot ng mga benepisyaryo.

Hindi aniya kayang bayaran o walang kapalit na halaga ang mapasaya ang kapwa sa bawat proyekto o programang maiaabot ng Pamahalaang Panlalawigan  para sa mga ito.Isa rin aniyang  napakalaking accomplishment ang pagkakataong sila ay mapaglingkuran.

Kabilang sa mga barangay na nabiyayaan ang San Isidro na may 1,075 packs, Sagana at San Josef na may 1,475 packs, 650 gift packs sa Barangay Pinagbayanan, 2,820 packs para sa Poblacion 1, 2, 3 at 4, 900 packs sa Barangay San Fernando, 1,030 packs sa Siclong, 1,475 packs sa Barangay San Felipe at San Juan, 320 packs sa Nauzon, 585 gift packs para sa San Vicente, 735 packs sa Barangay Canantong at 450 packs para sa Barangay Betania at Barangay San Antonio. –Ulat ni Jessa Dizon

 

 

 

41 local companies at overseas agencies, nag-alok ng trabaho sa mga Novo Ecijano

Matagal ng pangarap ni Karen Dioniso na magtrabaho sa barko, kaya naman nang mabalitaan niya na mayroong Crew Ship Company na kasama sa Jobs Fair sa isang mall sa Cabanatuan ay hindi na siya nagdalawang isip na mag-apply.

Isa lamang si Karen sa mahigit kumulang dalawang daang job seekers na hindi na pinalagapas ang pagkakataon na makahanap ng trabaho sa Ika-apat na Jobs Fair ng Pamahalaang Panlalawigan ngayong taon.

Ayon kay Provincial Public Employment Service Office (PESO) Manager Maria Luisa Pangilinan, hangad ng pamahalaan na mailapit ang mga employer sa job seekers upang matulungan ang mga aplikante na makahanap ng maayos na trabaho.

Sa tala ng PESO, tatlumpu’t dalawang local companies at siyam na overseas agencies ang nag-alok ng mga bakanteng posisyon para sa mga tiga-Nueva Ecija.

Ang Jobs Fair ay sa pakikipagtulungan ng Department of Labor and Employment, Department of Trade and Industry, Philippine Overseas Employment Administration, Technical Education and Skills Development Authority at SM City Cabanatuan.

Ang programa ay bilang bahagi rin ng pagdiriwang ng Ika-walumpu’t limang anibersaryo ng DOLE.

Ayon kay Maylene Evangelista Provincial Director ng DOLE-Nueva Ecija, ang Jobs Fair na Trabaho, Negosyo at Kabuhayan ay handog sa mga Novo Ecijano, upang mabigyan ng pagpipilian ang mga aplikante sa pagkakaroon ng maayos na trabaho, skills training at akmang negosyo o kabuhayan.

Kung ito ay inyong na-miss, maaring bisitahin ang facebook page ng Provincial Peso Nueva Ecija upang manatiling updated sa kanilang tanggapan. –Ulat ni Danira Gabriel

PGNE, nagpamahagi ng educational assistance sa higit 100 estudyante ng NEUST – Gabaldon

Nagpamahagi ang Provincial Government of Nueva Ecija ng educational assistance sa 146 estudyante ng Nueva Ecija University of Science and Technology – Gabaldon campus noong Huwebes, November 29, 2018.

Isa sa mga nakakatanggap ng tulong pinansyal ang iskolar na si John Patrick, Education student sa NEUST Gabaldon kung saan naging malaking tulong para sa kaniya ang nakuhang educational assistance dahil nakabawas ito sa tuition niya at iba pang mga gastusin sa paaralan.

Taos pusong pasasalamat naman ang ipinaabot ni Mary Joy na sa ring Education student sa natanggap na tulong galing sa Pamahalaang Panlalawigan.

Ang Stipend Program na sinimulan noong 2011 sa pangunguna no Former Governor Aurelio Umali at ipinagpatuloy ng kasalukuyang Ina ng Lalawigan Governor Czarina Umali ay naglalayong makatulong sa mga kabataang Novo Ecijano na maitaguyod ang kanilang pag-aaral.

Pinangunahan ni Doc Anthony Umali ang pamimigay ng cash allowance sa mga iskolar kasama si Board Member Peter Marcus Matias katuwang ang mga kawani ng Pamahalaang Panlalawigan.

Panawagan ni Doc Umali sa mga iskolar, sana ay gawing inspirasyon ng mga itoang istorya nilang magkakapatid na hindi naging hadlang ang dinanas nilang hirap makapagtapos lang ng pag-aaral.

Ayon sa kanya, ang paghihirap na iyon ang naging inspirasyon ng kanilang pamilya sa patuloy na pagseserbisyo at pagtulong sa mamamayang Novo Ecijano.

Pinaalalahanan naman ng kasalukuyang 3rd District Board Member Macoy Matias ang mga iskolar na pahalagahan nila ang edukasyon dahil hindi lahat ng kabataan ay nabibigyan ng pribilehiyo na makatungtong sa paaralan. –Ulat ni Jessa Dizon

Cactus at Succulent plants mabisang pampatanggal ng stress

Makulay at iba’t ibang uri ng Catus at Succulent plants ang i-dinisplay ng Lino Rom Collection sa harap ng Old Capitol sa ginanap na kauna-unahang Nueva Ecija meet and greet at training–seminar ng Cactus and Succulent Enthusiasts, sa Cabanatuan City noong sabado December 1.

Sa itsura at kulay pa lamang ng mga ito ay tiyak na mahuhumaling ka na at gugustuhin mag-alaga ng ganitong halaman.

Ayon kay Mr. Rom, ang pagaalaga ng Cactus at Succulent plants ay nakakatulong na magtanggal ng stress at nakaka-absorb din umano ito ng radiation.

Aniya, ang Gymnocalycium Species, Melocactus at Astrophytum ay mga uri ng Cactus na madaling alagaan at bagay sa mga baguhan na gustong mag-alaga ng halamang ito.

Paglilinaw din nito, hindi malas ang pagkakaroon ng halamang ito bagkus maaari pa nga itong pagkakitaan at pang negosyo.

Sa mensahe naman ni Doc. Anthony Umali sa kanyang speech sa pagdiriwang ng kauna-unahang Nueva Ecija meet and greet at training–seminar ng Cactus and Succulent Enthusiasts, ay ipapa-Seg. Register na umano ang grupo  para maging ganap na organisasyon ito.

Sinabi din ni Mr. Rom, na the Cactus Craze is on na dito sa Pilipinas dahil parami na ng parami ang Growers, Collectors at Sellers ng halamang ito kaya naman dapat na palawigin pa ang pagtuturo sa mga ito kung papaano ang tamang pag-aalaga ng Cactus at Succulent plants.

P3.2 bilyong 2019 Annual Budget ng Nueva Ecija, pinagtibay ng Sangguniang Panlalawigan

Inaprubahan sa Ika-dalawampu’t limang Regular Session ng Sangguniang Panlalawigan ang Proposed Annual Budget para sa taong 2019 ng Nueva Ecija noong December 3, 2018.

Sa kabuuan, ito ay nagkakahalaga ng P3,230,300,000 billion na pondo para sa susunod na taon.

Ang malaking bahagi ng budget na mula sa P563 milyon na Development Fund, ay gugugulin sa Social Welfare Services na umaabot sa P183 milyon para sa pagpapagawa at pagtatayo ng anim na pu’t siyam na mas pinagandang multi-purpose building and facilities, tatlong day care centers, senior citizen’s building at women’s building.

Ang multi-purpose building ay lalagyan na rin ng cr, kusina at tent upang magamit sa panahon ng kalamidad.

Habang ang P161 million ay ilalaan sa  pagpapasemento ng dalawampu’t anim na farm-to-market roads upang maging mabilis at madali ang kalakalan sa mga kanayunan sa probinsiya.

Bilang bahagi ng malasakit sa kalusugan ay magpapatayo ng apat na health centers sa mga bayan ng Guimba, Jaen, Peñaranda at Talavera. Bukod pa sa pagbili ng medical/hospital equipment ng anim na ospital na kinabibilangan ng ELJ hospital, district at community hospitals na aabot sa P8.9 milyon.

Walong milyong piso naman para sa instalasyon ng street lights at tatlong milyong piso para sa pagtatanim ng mga puno at pangangalaga sa kalikasan.

Ayon kay Gov. Czarina “Cherry” Umali, ang mga proyekto ay bunga ng serye ng konsultasyon sa mga lokal na pamahalaan at barangay sa lalawigan.

Kung ikukumpara ngayong taon, tumaas ng mahigit dalawang daang milyong piso ang budget para sa taong 2019. –Ulat ni Danira Gabriel

Regina Assumpta Kids Academy kampeon sa Kiddie Wizard 2018 Elementary Level

Itinanghal na kampeon ang Regina Assumpta Kids Academy sa ginananap na Kiddie Wizard 2018 Elementary Level noong Biyernes November 30, sa NE Pacific Mall.

2nd placer naman ang Wesleyan University Philippines at 3rd placer naman ang Laur Central School.

Kapwa nakatanggap ng medal of participation ang dalawang School na naging bahagi din ng kompetisyon, ang Cabanatuan East Central School at ang Lazaro Fransisco Integrated School.
Sa unang round pa lamang ng laban ay nanguna na ang grade six student ng Regina Assumpta Kids Academy na si Bradleur De Lara Cajucom.

At sa huli ay ipinamalas ni Cajucom ang kanyang husay at talino sa score na 10-0, kung saan siya ang tinanghal na kampeon.

Masayang masaya naman ang team ng Regina Assumpta Kids Academy dahil sa natanggap na kampeonato, proud na proud ang Mommy ni Bradleur Cajucom dahil sa ipinakita nitong galing sa Kiddie Wizard.

Sa mensahe ng Marketing assistant ng NE Pacific Mall na si Alexander Aquino taon taon ay isinasagawa nila ang ganitong patimpalak upang maipakita ng mga bata kung ano ang kanilang natutunan sa School.

Hinihikayat din niya ang mga ito na sumali sa ganitong kompetisyon upang magkaroon ng confidence at maibahagi sa iba ang kanilang mga kakayanan pagdating sa pag-aaral.

Mga kandidatong magtatapat-tapat sa Nueva Ecija para sa Halalan 2019, alamin

Matapos ang itinakdang huling araw ng Substitution of Political Candidates noong November 29, 2018 ng COMELEC ay malinaw na kung sino-sinong kandidato ang magtatapat-tapat para sa darating na 2019 Midterm Elections.

Sa hanay ng lokal na partidong Unang Sigaw, ay naghain ng kandidatura sa pagka-punong lalawigan si Former Gov. Aurelio “Oyie” Umali, kapalit ang kaniyang kuya na si Gil Raymond Umali.

Makakatunggali ni Umali ang dating Mayor ng General Tinio na si Virgilio Bote.

Habang si Doc Anthony Umali ay naghain ng Certificate Of Candidacy (COC) sa pagka-bise gubernador, substitute candidate ni Peñaranda Mayor Ferdinand Abesamis.

Makakatapat ni Doc Umali si 3rd District Board Member Edward Joson.

Si Gov. Czarina ”Cherry” Umali ay kumakandidato ngayon bilang kongresista ng ikatlong distrito, kahalili ni Former Bongabon Mayor Luisito Ronquillo.

Makakalaban ni Gov. Umali si 3rd District Congw. Ria Vergara.

Pagdating naman sa Lungsod ng Cabanatuan, nagkaroon ng “Switching” sa pagitan ni Ramon “Suka” Garcia na naunang naghain ng kandidatura sa pagka-bise alkalde ay kumakandidato ngayon bilang alkalde at si Gave Calling na unang kumandidato sa pagka-mayor ay bumaba sa posisyon bilang vice mayor.

Makakaharap ni Garcia sa pagka-punong lungsod si Myca Vergara na naghain noon ng kandidatura sa pagka-bise alkalde at Independent Candidate na si Philip “Dobol P” Piccio. Habang si Calling ay makakasagupa si Mayor Jay Vergara na naghain noon ng kandidatura bilang kinatawan ng ikatlong distrito.

Ayon kay Atty. Leylann Generoso Manuel, Acting Election Supervisor ng COMELEC-Nueva Ecija, maaari pa rin ang pagpapalit ng kandidato simula ng matapos ang deadline hanggang sa mismong araw ng eleksyon kung ang naturang kandidato ay namatay o nadiskuwalipika sa isang pinal na hatol.

Paglilinaw pa nito, ang substitute candidate ay kinakailangang may kaparehong apelyido ng kandidatong kaniyang papalitan.

Inaasahan na sa ikalawang linggo ng Disyembre ilalabas ng COMELEC ang pinal na listahan ng mga kandidatong magiging laman ng balota. –Ulat ni Danira Gabriel

Giant Ferris Wheel, Libre sakay para sa mga Gapanense

Libre  sakay para sa mga Gapanense  ang 6th biggest Ferris Wheel na matatagpuan sa lungsod ng Gapan na handog ni Mayor Emerson “Emeng” Pascual.

Labis ang kasiyahan ng mga Gapanense dahil sa pagkakaroon ng higanteng Ferris Wheel na handog ng Punong Lungsod para sa mamamayan ng Gapan.

Ang Giant Ferris wheel na nasa Gapan  ay itinayo ng Carron –Westech Manufacturing Corporation na  mayroong labing anim na talampakan at tinaguriang pang anim sa malalaking Ferris wheel na nasa bansa kabilang ang Star Wheel sa Star City(60 meters), Pampanga Eye sa  Sky Ranch sa San Fernando, Pampanga (55 meters), MOA Eye sa Mall of Asia(53 meters), Sky Eye sa Tagaytay City (50 meters), Picnic Grove sa Tagaytay City (45 meters) at kasalukyang Ferris Wheel na nasa Gapan na tinatayang apat napung metro.

Isa ito sa ipinangako ni Mayor Emeng Pascual noong nakarang taon na kanyang isinakatuparan ngayong taon upang  libreng makasakay ang mga Gapanense at mas mapa-bongga ang pinakainaabangang Christmas Festival sa Lungsod taun-taon.

Kabilang sa  ipinangako ng Alkalde ng Gapan ay ang ipinagmamalaking  Tunnel of Christmas lights na makikita mula sa Bucana ng Gapan  na may habang isang kilometro na pinagtulungan ng mga volunteers na Gapanense upang maikabit at mapaganda ang kanilang lugar na tatagal hanggang Enero sa-is sa susunod na taon.

Bago pa pinasinayaan ang Giant Ferris Wheel at inilawan isang daang talampakan na higanteng Christmas Tree noong December 1, 2018  ay nagkaroon ng maikling programa, binasbasan ng pari ang nagniningning na belen na nasa gilid ng entablado at nagsagawa  rin ng pampasayang bilang ang mga opisyales, umabot naman sa humigit kumulang dalawampung minuto ang magarbong Fireworks display na naging tampok din sa festival.

Kasama rin sa nagpasaya ng gabi ay ang Guest Singer-song Writer  na si Janno Gibbs na pinaindak, pinakilig at pinasaya ang mga Gapanenses sa kanyang sunud-sunod na kanta na pinamagatang pinakamagandang lalaki, Si Aida o si Lorna o si Fe, ipagpatawad mo,  lumayo ka man sa akin at ang hit na hit original song nito na fallin.-Ulat ni Getz Rufo Alvaran.

https://youtu.be/rluiWfdjLvo

Doc. Anthony Umali, naghain ng kandidatura bilang Bise Gobernador ng Partido Unang Sigaw

Dalawang araw bago ang huling araw nang submission ng substitution na itinakda ng COMELEC ay naghain ng Certificate Of Candidacy (COC) si Doc Anthony Umali kahapon, November 27, 2018 sa posisyon na pagka-bise gobernador ng Unang Sigaw Partylist para sa darating na 2019 midterm elections.

Pinalitan ni Umali, ang nauna nang naghain ng kandidatura sa ilalim ng Partido Unang Sigaw na si Peñaranda Mayor Ferdinand “Blue Boy” Abesamis na umatras, noong November 20.

Ayon kay Umali, kaakibat ng kaniyang pagtakbo ay ang paghahangad na mas mapalawak pa ang pagbibigay ng may malasakit na serbisyo sa mga Novo Ecijano.

Si Umali ay dati nang nagsilbi bilang Board Member ng Ikatlong Distrito at nanalo bilang Cabanatuan City Vice Mayor nitong election 2016.

Samantala, kahapon din ay nagpalit ng tatakbuhing posisyon ang dalawang pambato ng Partido Unang Sigaw sa Lungsod ng Cabanatuan.

Si Ramon “Suka” Garcia na naunang naghain ng kandidatura sa pagka-bise alkalde ay nag-withdraw at kumakandidato ngayon bilang Mayor.

Iniatras din ni Gave Calling ang kaniyang kandidatura sa pagka-mayor at bumaba ngayon sa posisyon bilang Vice Mayor.

Habang binawi rin ni Richard Medina ang kaniyang kandidatura sa pagka-konsehal upang bigyang daan si Ariel Severino sa naturang posisyon.

Binigyang linaw naman ni Atty. Leylann Generoso Manuel, Acting Election Supervisor ng COMELEC-Nueva Ecija at City Election Officer ng Cabanatuan, na posible pa ring magpalit ng posisyon ang mga kandidato hanggang November 29.

Aniya, patuloy na tatanggap ang COMELEC ng substitution ng mga kandidatong umatras, namatay o na-disqualify. –Ulat ni Danira Gabriel

High tech J and E Rice Mill, matatagpuan sa Bayan ng Cabiao

Ang pagsasaka ng palay ang pangunahing kabuhayan sa Lalawigan ng Nueva Ecija, kaya nga ito binansagang Rice Granary ng Pilipinas.

Kaugnay nito, ay patok din na kabuhayan ang mga negosyo na may kinalaman sa agrikultura.

Kagaya na lamang ng kiskisan ng palay o rice mill.
Sa Bayan ng Cabiao, matatagpuan ang high tech na rice mill sa buong probinsiya na J and E.

Sa pamamagitan ng mga naglalakihang makabagong makina na nagmula pa sa ibang bansa ay mas pinadali at mas pinamoderno ang paggigiling ng mga palay.

Halimbawa na lamang ang makina na tinatawag na Big Rice Mill, na may kakayahang magkiskis ng palay ng 120 tons a day o katumbas ng dalawang libong kaban kada isang araw.

Mula sa sako-sakong palay, ay hihigupin ang mga butil nito ng isang tubo, dadalin sa tinatawang na Stoner upang maihiwalay ang mga piraso ng bato sa mga butil ng palay. Sa Paddy Separator Machine naman, unti-unting binabalatan ang mga palay upang maging ganap na bigas.

Mayroong tatlong makina sa Whitener na maaaring pamilian ng mga customer, kung gaano karaming beses nila gugustuhing mapaputi ang kanilang bigas.

Habang ang Rice Grader Machine naman, ang naghihiwalay sa mga butil ng bigas na buo, kalahati ang buo, medyo durog at binlid.
Sa Water Polisher, dito na ginagawang makintab at maganda ang mga finished product na bigas.

At pagkatapos ng ilang minuto ay babagsak na ang bigas sa tubo sabay isisilid sa sako at tatahiin gamit pa rin ang modernong makina.

Ayon kay Christian Uvas, Marketing Personnel ng J and E Rice Mill, bukod sa mga miller na maramihan kung magpakiskis ng palay ay tinatanggap din nila ang mga maliliit na magsasaka na nagnanais na magpagiling ng kanilang mga inaning palay ng paisa-isa sa murang halaga dahil sa makina na Small Rice Mill.

Bukod sa mga rice mill, kaya rin ng J and E na magpatuyo ng mga basang palay, mais, soybean at iba pa sa pamamagitan ng Grain Dryer.

Ayon kay William Macatula, HR at Marketing Head, ng Rice Mill, ang J and E ay nagbukas noong September 8, 2018 na pagmamay-ari ng mag-asawang Jennefer at Erik Braanen na nagnanais na matulungan ang mga mamamayan ng Cabiao na magkaroon ng maayos na trabaho at dekalikidad na produkto sa mga Novo Ecijano.

Ang kanilang serbisyo sa Big Rice Mill ay nagkakahalaga lamang ng P45 kada kaban, P2 kada kilo naman sa Small Rice Mill at P1 kada kilo sa Dryer.

Ang J and E ay matatagpuan sa Brgy Sta. Ines, Cabiao, Nueva Ecija. –Ulat ni Danira Gabriel

5 pares na kawani ng kapitolyo, nagpatalasan ng isip sa Chess Tournament ng Palarong Kapitolyo 2018

Gamit ang chess mat, chess pieces, at Chess clock ay sumabak  ang limang pares ng mga empleyado ng Pamahalaang Panlalawigan sa unang laban ng Chess Tournament ng Palarong Kapitolyo 2018  kahapon Miyerkules, November 28, 2018.

Sa aming panayam kay Virgilio Paguinto,isa sa kinatawan ng Provincial Sports and Youth Development Office,  ang paglalabanan aniya ng mga kawani ay ang  Round Robin, maglalaban laban ang sampung kalahok, at magpaparamihan ng panalo, wala rin aniyang limitasyon sa kahit sinong gustong sumali mula sa ibang departamento basta’t kaya ng isang manlalaro.

Dagdag pa niya hindi lamang dapat nakapokus ang bawat pamahalaan mapa-lokal at nasyonal sa iba pang mga sikat na laro katulad ng Basketball at Volleyball sapagkat ang larong chess aniya ay isang napakagandang sports na  nabibigyan ng pagkakataon ang lahat mapa- kababaihan na makatunggali ang mga kalalakihan.

Layunin nito ay hindi lamang mapalakas ang katawan bagkus mapatalas ang isipan ng mga kalahok, magkaroon ng kasiyahan sa sa pagtatapos ng taon sa pamamagitan ng  isang masayang palaro.

Kabilang naman sa mga departamentong lumahok sa larong Chess ay ang Provincial Budget Office, Provincial Health Office, Provincial Accounting, Provincial Disaster Risk Reduction and Management Office,at  Provincial Social Welfare and Development Office.

Ayon naman kay Ace Wenceslao, Disaster Officer 2 mula PDRRMO, hindi siya makapaniwala na makakapaglaro siya sa chess competition.Nagbasa-basa lang aniya siya noon  para makakuha ng iba’t ibang techniques and strategies sa larong Chess.

Masaya at Challenging naman para kay JJ Miranda, Clerk 1 ng Assesor’s Office ang mga ganitong palaro.

Nagbigay naman ng Tips si 2-time Chess Champion Eduardo Serrano, Messenger mula sa Provincial Budget Office, katulad ng pagkakaroon ng tiwala sa sarili, konting pag-eensayo at mahalaga aniya na  isa puso dapat ang paglalaro.

Ang mas maraming panalo at mas maraming puntos ang tatanghaling kampeon na makakatanggap ng medals, trophies at cash prizes.

Samantala, nakatakda naman ang Final Chess Tournament sa December 11, 2018 at sa December 12, 2018 naman ang awarding sa para sa tatanghaling over-all champion na Departamento.-Ulat ni Getz Rufo Alvaran.